پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى نۇرلان بايبازاروۆ ۇكىمەت 200-دەن استام جوبانى قامتيتىن ۇلتتىق ينفراقۇرىلىم جوسپارىن ازىرلەگەنىن مالىمدەدى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
«جۇمىس 2029 جىلعا دەيىن جالعاسادى. سول ارالىقتا وسى 200-دەن استام جوباعا 40 ترلن تەڭگەدەن استام ينۆەستيتسيا جۇمسالادى», دەدى ۆيتسە-پرەمەر.
17 جوبا ىسكە اسىرىلىپ جاتىر. ول – ەنەرگەتيكا, كولىك, لوگيستيكا, سۋ شارۋاشىلىعى جانە تسيفرلىق ينفراقۇرىلىم سالاسىنداعى جوبالار. بيىلدىڭ وزىندە 770 ملرد تەڭگەگە جۋىق ينۆەستيتسيالار وسى جوبالارعا باعىتتالادى. ەلىمىزدە تەمىر جول قۇرىلىسى جوبالارى جالعاسىپ جاتىر. بىلتىر «دوستىق – مويىنتى» جولى باستالدى, الماتىنى اينالىپ ءوتۋ جوباسى قولعا الىندى. سونىمەن قاتار بيىل جاڭادان «ماقتاارال – داربازا», «اياگوز – باقتى» تەمىر جولدارى سالىنادى. بۇل جوبانىڭ ىسكە اسىرىلۋى ەلىمىزدىڭ كولىك-ترانزيت الەۋەتىن ارتتىرۋعا باعىتتالادى.